刘军连治疗尖锐湿疣 https://disease.39.net/bjzkbdfyy/210826/9366673.html
<

原创吳翼民海上梦叠

作者：吳翼民

沪语改写：边秦翌

讲述：徐建青

审阅、推荐：丁迪蒙

编辑：王乙其

无疑，夏天辰光江南人最欢喜吃个水产应该是黄鳝。有道是“小暑黄鳝賽人參”，讲个就是黄鳝滋补营养价值勒勒夏季达到了高峰。所以到了迭段辰光，家家戶戶个台子浪三日两头就要上黄鳝搿只菜，要么是蒜子鳝筒，要么是鳝筒烧肉，有辰光是响油鳝糊，只要黄鳝菜上台子，迭家人家个吃饭台子就显得邪气好看，也可以叫做是邪气高档伐。尤其是搿些年，黄鳝个身价冲得蛮结棍个，其中野生黄鳝更加算是奇货可居，比肉价钿要贵交关，搭老底子正好倒过来。老底子黄鳝烧肉，肉是主角，黄鳝是配角，搿歇黄鳝变成功主角了，肉只好当当配角，有辰光顶多只好算跑龙套个唻。

有得一种搭黄鳝可以等量齐观个水产叫做白鳝。所谓“白鳝”，其实就是河鳗，或者叫做“鳗鲡”。我觉着叫做“白鳝”最形象，因为伊个样子像煞是黄鳝，必过，背是咖啡颜色，肚皮是白颜色，搭黄鳝摆勒一道，一黃一白，清清爽爽。伊搭黄鳝一样，勒乡下头水田里向常庄会得看到个。早年我勒乡下头插队落户，常庄勒水稻田里，勒末生头就好捉着一条，——白鳝欢喜勒水稻田里游发游发，但要侬真个要拿伊捉到，也是千年难板个，十有八九拨伊一滑就溜之大吉了，所以乡下头有得句闲话，叫做“逃脱个鳗鲡手臂膊粗”，意思是呒没得到个物事总归是最好个。白鳝个肉质细腻肥腴鲜美，优质蛋白营养价值邪气高，拨日本人捧为“软黃金”。假使讲台子浪有一盘清蒸河鳗或者红烧河鳗，伊个吸引力绝对是超过黄鳝个。

河鳗勒河塘里向是鱼虾个杀手，搭仔黑魚一黑一白，有点像阴司个“黑白无常”，橫行霸道、勾魂摄魄，假使讲一只鱼塘里向有了“黑白无常”，乃末魚塘主个亏就大唻，必过搿也是黑鱼搭仔白鳝为啥味道介鲜美个原因呀。

假使讲，河塘个河鳗老结棍，海里个海鳗也是同样凶残个，海鳗比河饅要大得多，牙齿尖厉，横冲直撞，专门吃小鱼小虾，有辰光，还要吃海里动物个尸体，吓人伐。我曾经听人家讲过搿种故事，吓得来我从来勿敢碰海鳗，一直到我讨了个上海太太，伊拉屋里亲眷朋友偏生最欢喜吃用海鳗腌制个鳗鲞，搿种鳗鲞勒上海是最受欢迎个一道年菜。我觉着有点好奇，试了一记，真个是又鲜又美，告咾上海人介欢喜。我曾经看到过上海人家自家屋里做鳗鲞个场面，哦哟，勿得了，弄堂里屋檐下头一排生腌制个鳗鲞吊勒海，一条一条，长长个，一眼望勿到头，邪气气派。鳗鲞是蒸勒吃个，冷下来之后直接用手拿皮搭仔刺弄清爽，扯成功一块一块，像手扯鸡一样，吃起来老便当，也邪气过念头。

除脱黄鳝搭仔白鳝，勒阿拉屋里个菜谱当中还有只“绿鳝”。其实是呒没“绿鳝”迭只物事个，搿是我自家造出来个名字，就是长豇豆啦。侬看呀，绿颜色、长悠悠个豆，比黄鳝白鳝要细得多。我开玩笑叫伊“绿鳝”，还有只故事唻。

长豇豆搭仔黄鳝一样侪是热天介个时令菜，到了三伏天，长豇豆简直就成为了“救命菩萨”，伊搭仔冬瓜、茄子一道，一记头变成功台子浪个三只大亨，侪是当家菜；而且长豇豆有只特点，勒农家个豆棚架浪，生生勿息、源源勿断。记得有一趟，阿拉屋里烧了长豇豆，齐巧也烧了黄鳝，囡儿当时辰光还小，伊一门心思吃黄鳝，勿去碰长豇豆。我看囡儿勿大肯吃长豇豆，就存心搭伊讲：“哎呀，黄鳝好吃，其实绿鳝也老好吃个。”囡儿勿懂，就问：“绿鳝？啥是绿鳝啊？”我快点指指盛长豇豆碗：“搿勿是绿鳝啊？搭黄鳝一样，也是一段一段个呀。”一听迭个物事是绿鳝，囡儿一记头来了兴趣，筷子伸到长豇豆个碗里，我马上再讲：“迭个绿鳝啊，虽然口感呒没黄鳝介好，但是营养勿比黄鳝差噢，小姑娘吃了之后，会得变得更加漂亮唻。”囡儿听我闲话，就吃了好几口绿鳝。一直到今朝，阿拉屋里还是会得用“绿鳝”迭个词，当然咾，也印证了我讲过个“营养价值高”迭句闲话。绿鳝，的确是绿色食品呀。

作者：吳翼民

讲述：徐建青

—————————————————

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年儿童出版社

《实用沪语》复旦大学出版社

《上海话绕口令》少年儿童出版社

《上海方言词语使用手册》上海教育出版社

《上海话读成语故事》少年儿童出版社

《囡囡学童谣》，少年儿童出版社

《囡囡学成语》，少年儿童出版社

原标题：《黄鳝、白鳝搭“绿鳝”》